आश्विन ३०, २०७२- एमाले
वरिष्ठ नेता तथा
पूर्वप्रधानमन्त्री माधवकुमार नेपालले
प्रधानमन्त्री निर्वाचनमा ‘भद्र सहमति’
तोडेर गल्ती गरेको स्वीकारे कांग्रेसलाई
राष्ट्रपति दिन सकिने संकेत गरेका छन् ।
उनले राष्ट्रपति पदको नाम नलिईकन
‘चाहेको ओहोदा’ दिन सकिने भन्दै
त्यसतर्फ संकेत गरेका हुन् ।
कांग्रेसले राष्ट्रपतिमा इच्छा
देखाइरहेका बेला सत्तारूढ प्रमुख दलका
प्रभावशाली नेता नेपालबाट यस्तो
धारणा आएको हो । एमाले कागेश्वरी
मनोहरा १३ नगर कमिटीले शनिबार
गरेको शुभकामना कार्यक्रममा नेता
नेपालले कांग्रेस सरकारमा समेत सहभागी
हुन तयार हुनुपर्ने सर्त अघि सारे ।
‘कांग्रेसले हिजो भद्र सहमति उल्लंघन गरेर
विश्वासघात गरे पनि विगतको
कमजोरी स्वीकारेर सरकारमा आउन
सक्छ, त्यसो हुँदा उसले चाहेको ओहदा
दिन सकिन्छ,’ नेपालले भने । कांग्रेसले
गल्ती गरे पनि राजनीतिलाई सहज
रूपमा अघि बढाउन उदार रूपले प्रस्तुत
हुनुपर्ने धारणा एमालेभित्र केही नेताहरूले
राखिरहेका छन् ।
सरकार लामो समयसम्म चलाउन र
संविधानको कार्यान्वयन सहज बनाउन
कांग्रेसप्रति नरम व्यवहार गर्नुपर्ने
उनीहरूको राय छ । यो विषयमा एमाले
बैठकमा भने औपचारिक छलफल भएको छैन ।
विशेष गरी नेता नेपालसहित उनको
समूहले काग्रेससँग निकट सम्बन्ध राखेर नै
बढी काम गर्न सकिने भन्दै त्यही ढंगले
प्रस्तुत हुनुपर्ने राय प्रधानमन्त्री तथा
पार्टी अध्यक्ष केपी ओलीलाई पनि
दिएका छन् ।
राष्ट्रपति पदको वातावरण बनाउनकै
लागि कांग्रेसले शुक्रबार संसदमा भएको
सभामुख निर्वाचनमा उम्मेदवारी
दिएको थिएन । मतदान नै हुने अवस्थामा
सत्तारूढ गठबन्धनका उम्मेदवारलाई
सभामुखमा मत दिन कांग्रेसले आफ्ना
सांसदलाई हविप जारी गरेको थियो ।
नेता नेपालले सत्तारूढ दलबीच एमालेले
राष्ट्रपति लिने सहमति भएको उल्लेख
गर्दै यसबारे अन्य दलहरूसँग पनि छलफलपछि
निर्णयमा पुग्ने बताए । दसैंलगत्तै
राष्ट्रपति र उपराष्ट्रपति चयन
प्रक्रिया अघि बढ्छ । संसद् सचिवालय
स्रोतका अनुसार कात्तिक ७ मा बस्ने
संसद् बैठकपछि यसलाई अघि बढाउने
तयारी छ । पहिले सहमतिको प्रयास
गरिने र त्यसबाट सफल नभए बहुमतीय
प्रक्रिया आरम्भ हुनेछ ।
यसैबीच एमाले नेता नेपालले पहिलो
महिला सभामुख निर्वाचित भएकामा
सम्पूर्ण नेपाली महिला हर्षले
गौरवान्वित भइरहेको उल्लेख गर्दै
राष्ट्रपति पनि महिलाबाटै
निर्वाचित गर्न सक्दा मुलुकका लागि
ऐतिहासिक हुने बताए । उनले
तराईकेन्द्रित दलमा संविधानप्रति केही
असन्तुष्टि रहे पनि प्रधानमन्त्री र
सभामुख–उपसभामुखको निर्वाचनबाट
उनीहरूले संविधानलाई शतप्रतिशतले
स्वीकार गरिसकेको दाबी गरे । उनले
आन्तरिक मामिलामा भारतले
अनावश्यक हस्तक्षेप गर्न जरुरी नभएको
धारणा पनि राखे । ‘नेपालको
मामिलामा भारतले हस्तक्षेप गर्न जरुरी
थिएन, बरु नेपाली जनता भोकै बस्न
सक्छन्, समर्पण गर्न तयार छैनन्,’ नेपालले
भने ।
नेपाल भ्रमणमा आउँदा भारतीय
प्रधानमन्त्री नरेन्द्र मोदीको प्रस्तुतिले
विश्वास र प्रतिष्ठा बढेको भए पनि
अहिले उनीमाथि प्रश्न उठेको उनले
उल्लेख गरे । उनले काठमाडौंलाई तराई
जोड्ने फास्ट ट्रयाक भारतीय
कम्पनीलाई दिई भ्रष्टाचारका लागि
मुलुक नै डुबाउने राष्ट्रघाती काम हुन
लागेको भन्दै त्यसलाई रोक्न सरकारको
गम्भीर ध्यानाकर्षण पनि गराए । ‘४०
अर्बमा हुने फास्ट ट्रयाकको काम १ खर्ब
१२ अर्ब रुपैयाँमा भ्रष्टाचारका लागि
भारतीय कम्पनीलाई दिएर देश डुबाउन
खोजिँदै छ,’ उनले भने, ‘विजय गच्छदारजी
त्यस्तो राष्ट्रघाती काम तुरुन्तै रोक्नुस्
।’
0 comments:
Post a Comment